Draumar – Ein af ástæðunum fyrir því að ég trúi á tilvist hins andlega
Þorkell @ 15.55 11/8/03
Það hafa verið nokkuð fjörugar umræður á annál Árna Svans upp á síðkastið um allt milli himins og jarðar sem snertir trú. Þar byrjaði ég að ræða um drauma og annað sem sannar fyrir mér tilvist hins andlega. Mig langar að taka umræðuna upp hérna og gera betur grein fyrir reynslu minni en ég ákvað að draga mig úr umræðunum á lista Árna Svans vegna þess að ljóst var að að vissir trúarandstæðingar höfðu ekki vilja til að ræða málin, heldur var markmiðið n.k. sjálfskipuð krossferð gegn trúuðum með tilheyrandi fúkyrðum og stælum (sjá einnig skrif mín í umræðunum á annáli Árna Svans).
Ein af ástæðunum fyrir því að ég trúi á tilvist hins andlega er reynsla mín af draumum. Fyrir mér sanna þessir draumar tilvist hins andlega. Ég vil taka það fram að ég er ekki að tala um táknræna drauma, sem maður þarf að styðjast við draumráðningabækur til að skilja, heldur drauma sem rætast bókstaflega. Hér er eitt dæmi:
Ég var sendur í sveit þegar ég var barn. Þetta var gert í gegnum félagsmálaráðuneytið og því fór ég aldrei til sama sveitabæjarins tvisvar. Eitt skiptið kom ég á sveitabæ, seint að kveldi. Ég fór að sofa án þess að vita nokkuð um fólkið sem bjó þar, mundi varla hvað það hét. Um nóttina dreymdi mig að síminn hringdi og húsmóðirin svaraði. Henni var tjáð í símanum að móðir hennar væri látin og fór hún þá að hágráta. Um morguninn velti ég því fyrir mér hvort hún ætti móður á lífi og hvernig stæði á þessum draumi. Í því hringir síminn og hún svarar. Eftir smá tíma fór hún að gráta en seinna um daginn var mér tjáð að móðir hennar væri látin.
Fyrir mér sanna slíkir draumar tilvist hins andlega. Ástæðan er sú að efnið er fast í tíma. Það getur ekki farið fram eða aftur í tímann. Ef heimurinn væri aðeins efni gæti ég ekki hafa vitað um óorðnahluti. Því komst ég að þeirri niðurstöðu að gera þyrfti ráð fyrir því að til væri eitthvað meira en efni, þ.e. það sem við köllum andlegt.
Þessi reynsla mín var reyndar útskýrð þannig á umræðulista Árna Svans að minnið væri að svíkja mig.
- Í fyrsta lagi er mjög auðvelt að forðast umræður með því að koma með slík rök. Í raun verður öll reynsla marklaus því það er alltaf hægt að koma með slíkar ásakanir. Og þar sem reynsla manna er í raun grunnur tilvistar þeirra er lítið eftir ef ekki er hægt að vísa til hennar.
- Í öðru lagi hefur þetta gerst allt of oft til þess að ég geti afgreitt draumana svo auðveldlega.
- Í þriðja lagi hef ég stundum sagt fólki sem mig dreymir um hvað myndi gerast, og því er þetta ekki bara bundið við mína eigin minningu.
En það eru ekki bara draumar sem sanna fyrir mér tilvist hins andlega. Ég hef oft fundið á mér þegar eitthvað gerist í lífi annarra, og fyrir þessu hef ég margar sannanir og mörg vitni. Ég vissi t.d. þegar konan mín lenti í bílslysi áður en hún kom heim og bar mér fregnirnar. Ég fann það bara á mér. Um leið og hún gekk inn um dyrnar spurði ég hana hvað hafi komið fyrir bílinn án þess að ég hafi litið út um gluggann og vitað að henni var keyrt heim.
Ég hafði svipaða reynslu þegar næst-elsta dóttirin fæddist. Lindita var lögð inn á sjúkrahús, eftir sex mánaða meðgöngu, vegna þess að hún fékk meðgöngueitrun. Þar hafði hún verið í nokkurn tíma, en eitt kvöldið vissi ég að eitthvað var að gerast. Ég var sannfærður um að síminn myndi hringja því það væri eitthvað að hjá Linditu. Síminn hringdi en vinur minn var í símanum vegna máls sem kom konunni minni ekkert við. Eftir að ég hafði talað við hann var þessi tilfinning enn sterkari en áður og í því hringdi síminn og mér var tjáð að Lindita væri orðin fár veik. Ég fór upp á sjúkrahús en var tjáð að ekkert yrði gert fyrr en með morgninum. Mér var því sagt að fara heim og sofa. Þau myndu síðan hringja í mig þegar ég ætti að koma aftur. Ég gerði það en á kl. sjö um morguninn vaknaði ég upp sannfærður um að síminn myndi hringja. Ég var svo sannfærður að ég gekk í átt að símanum til að svara honum áður en hann hringdi. Í því sem ég var að koma að símanum hringdi hann og mér var tjáð að koma strax upp á spítala.
P.s. Ef þið viljið tjá ykkur um þessi málefni þá vinsamlegast gerið það málefnalega. Öllum ómálefnalegum svörum, skætingi eða stælum verður eitt út af annálnum.
Matti @ 11/8/2003 19.18
“P.s. Ef þið viljið tjá ykkur um þessi málefni þá vinsamlegast gerið það málefnalega. Öllum ómálefnalegum svörum, skætingi eða stælum verður eitt út af annálnum.”
Svona fyrirvari er nú ekki beinlínis hvetjandi, sérstaklega þegar þú hefur sýnt að þú villt ekki samþykkja aðrar mögulegar skýringar á þessum frásögnum.
Líði þér vel í þinni trú.
Ein spurning að lokum, trúir þú á geimverur. Þ.e.a.s. geimverur sem koma til jarðar, ræna fólki um miðjar nætur og troða einhverjum járnstöngum upp í endaþarminn á því? Spurninguna set ég fram af fullri alvöru.